15 Jan 2017 - 14:00

Weert

OEËPENING VASTELAOVENDJSEZOEN MET “VORST OPPE TROEËN”

De ‘Boonte Femiêliemiddig’ és ‘n aaneinschakeling van korte sketches en lidjes. Ervare artieste uut eige stâl én jónk aanstôrmendj talênt laote de bezeûkers van 2 wis 88 jaor geneête van ‘n spétterendje vuuërstélling vôl humor, lôl en muziek. Dit jaor zâl dieëze middig in ‘t teiken staon van mysterie. ‘t thema “Woeë droûme uutkaome” mót zörge vör ‘ne schoeëne middigdroûm. ‘t Pebliek wûrtj mejgenoeëme in ‘n verhaol met ridders, preensesse en kastieële. De brândweer ruktj spraekwoeërdelik uut en en professor Klauwen és in de muuëgelikheid um stumme te staele. In dieëze tiêd vôl Pokémons wûrtj tiêdes de vuuërstélling neet gejaagdj op Pokémons mer és d’r ‘ne nowwe Jeugdpreens-Go-app ontwikkeldj. Dieëze app zâl uuteindelik steûre nao ‘t hoeëgtepûnt van de ieërste ‘Boonte Femiêliemiddig’; de uutroôping van de nowwe ‘Rogstaekers Jeugdpreens 2017’.

Kortum: gehieël in stiêl ‘t vastelaovendjsezoen beginne vör jónk en aod. Op zoondig 15 en zaoterdig 21 jannewarie stieët in ’t Munttheater de Boonte Femiêliemiddig 2017 van V.V. de Rogstaekers op ’t program.

Kaartverkoûp beej de kassa van ’t Munttheater of online Munttheater.