31 Okt 2017 - 11:11

Maastricht

Peersberiech

Mestreech, 31 augustus 2017

Naomes ‘t ‘Volk vaan Mestreech’ is Stadscarnevalsvereineging De Tempeleers op zeuk nao dé Stadsprins veur ‘t jaor 2018. Wee weurt oonderdeil vaan de Mestreechter historie en geit
‘Groet Mestreech’ veur es 72e Stadsprins?

Vacature:

Stadsprins Mestreech (ruim 4 weke, 24 oor per daag)

Functie-umsjrijving
Stadscarnevalsvereineging De Tempeleers zeuk ‘nen enthousiaste ‘stimulator’, ‘n maan tösse de 30 en 45 jaor, joonk vaan geis en mèt geveul veur humor. Daoneve moot euzen druimkandidaot ‘nen aimabele persoen zien, sociaalvaardeg en tösse alle soorte Metreechtenere kinne stoon. Ouch moot ‘Zienen Hoegen Hoeglöstegheid’ aontoenbaar besjikke euver oetstekende (mondeling) vaardegheid in ‘t Mestreechs dialek, woenechteg zien in Mestreech (adres later te beneume als ‘Prinselek Pelies’). Euze Stadsprins 2018 moot ‘nen echte carnevalsvierder zien en besjikke euver de ‘Mestreechter Geis’.

Eus aonbod (oonder mie):
– ‘n Aonstèlling vaan zoondag 14 jannewarie 2018 tot en mèt dinsdag 13 fibberwarie 2018 00:00 oor (gein verlenging meugelek).
– e Prinsheerlek geveul.
– ‘n Plezerege wèrkumgeving mèt ruim 30 behölpzaam en enthousiaste wèrknummers, geneump Tempeleers.
– Ruim 122-doezend enthousiaste ‘volgers’ (‘t Volk vaan Mestreech).
– Mie es 200 leuke en reurende wèrkbezeuke aon vereineginge, instèllinge, ‘t hospitaol en festiviteite.
– Privéverveur mèt chauffeur .

Eur reactie:
De ierlekheid gebeujt te zègke tot v’r neet zitte te wachte op eur rechstreekse reactie, meh wel op de reactie vaan lui oet eur ömgeving. Dink geer te wete wee aon ‘t gesjets profiel voldeit en höb g’r euzen druimkandidaot veur ouge? Völ daan veur 1 november 2017 ‘t aonmelformuleer in en sjik dit, mèt ‘n zoe compleet meugeleke motivatie en bij veurkäör veurzeen vaan inkel representatief foto’s, op nao Sikkertaris Ginneraol, Tempeleer Nico Kempeners via sikkertaris-ginneraol@tempeleers.nl of per pos: Tempeleers Mestreech, t.a.v. Sikkertaris Ginneraol Nico Kempeners, Mestreechterlaon 80, 6241 JB Bun.

‘t Formuleer kint geer vaanaof 1 september 2017 downloade via www.tempeleers.nl

Acquisitie nao aanleiing vaan dees vacature is neet gewins.