7 Jan 2018 - 14:11

Heythuysen

Heitser Vastelaovesleedjes Kónkoer

[Klik väör groëter beeldj] Op zunjig 7 jannewarie zal inne Kwakkertepool (café Den Hook) weer ’t Heitser Vastelaovesleedjes Konkoer, aafgekortj HVK, waere georganiseerdj. Eine deskundige jury zal de artieste neet allein beoordeile op muzikaliteit, mer ouch op orginaliteit en presentatie. Ederein, vanaaf 16 jaor kan mètdoon, zoeëlang mer in ’t plat gezonge waertj. Doe moogs ein gans nuj plaetje make, mer doe moogs ouch eine nuje tekst op ein bestaondje melodie make.

We gaon ouch efkes trök nao vastelaoveszunjig van ’t aafgeloupe jaor. Inne tent bie Vullers waerdje dao “Kwakkert On Tour” gepresenteerdj. Dit evenement waertj steeds groeëter, mèt steeds mieër deilnemers. Deilnemers die zich väöraaf aanmelje, mer ouch steeds mieër spontane aanmeljinge gedorendje deze aovendj. Det juiche wae natuurlik van herte toe. Dao kóme talente nao baove woeëvan de minse zélf neet wiste det ze die haaje… Det det nao mieër smeuktj bliektj waal oet ’t feit det versjillendje debutanten toezègke óm zich in te sjrieve väör ’t kómendje Heitser Vastelaovendjleedjes Konkoer. Die minse kinne zich den noe eindelik insjrieve.

Wae houpe det ederein dae toe haet gezag óm mèt te doon, zeen belofte naokumtj. Den waertj ’t eine sjoeëne middig mèt oetloup nao de vreuge aovendj…
http://www.de-kwakkert.nl/nuuts.htm#hvk