23 Sep 2017 - 20:11

Grubbenvorst

Grubbevorster Vastenaoves Liedjeskonkoers Gvk

GVK 2017-2018: Maak ut meij!

En dân heb ik ut netuurlik euver ôs jaorlikse Grubbevorster Vastenaoves Liedjeskonkoers, dât dit jaor geijt plaatsvinde op zaoterdigaovend 23 september aanstaonde. Ik herinner ut mich nag wiej d’n daag vân gister, de nek aan nek rees tusse ut APC en Bjorn de aafgelaupe edisie,.. zal ut ok dit jaor wir zoë spannend waere? Wae wet… ik zuuj zegge, maak ut meij en bin d’r beej!

Mâr vurdât ut zoë wiéd is, zien we nag op zeuk nao krejetieve schriévers, kompeniste en andere muzikale talente, jônk én ald!

Degene dae al dukker haet meij gedaon wet wiej ut spelke in zien werk geijt. Van ôg zeen we dân ok gaer de aanmelding úúterlik 1 september aanstaonde in ôzze meelboks: liedjeskonkoer@plaggenhouwers.nl

Gaer ut volgende d’r beej vermelde: naam liedje + teksschriéver + kompenis + oétvoerende(n).

Hes-se nag noeijts meij gedaon, mâr liek ut dich wal híél erg gaaf, um is op die prachtige búún te staon en de ganse zaal aan ut sjoenkele te kriége? Ôk dân bisse vân herte welkom!

As-se genne teksschriéver of kompenis hes dae dich en leuk liedje mâk, dân kâns-se gewoën efkes kontak met ôs opneme via utzelfde ie-meel adres liedjeskonkoer@plaggenhouwers.nl en dân gaon weej dich helpe beej ut metsje vân de juuste teksschriéver / kompenis zoëdât haopelik idderein dae wil, meij kân doon.

Andersum kân netuurlik ok: wils-se juús gaer schriéve of kompenaere mâr steis-se leever ni zelf op de planke en bis-se dus op zeuk nao enne arties vur dien nummer? Ok dân meugs-se efkes kontak met ôs opneme en weej zulle dich verder helpe!

Weej wille dit jaor spesjaal enne oproop doon aan de jeugd um zich op te gaeve vur dit muzikale spektakel! De letste jaore hebbe we diverse jeugdige artieste op de búún gehad, dât zeen weej hiël gaer want de jeugd haet immers de toekoms! Allein aafgelaupe jaor schitterde de jeugd helaas door aafwezigheid. Haopelik waar dât einmalig en meuge we ôg dit jaor wir en zoëwal jeugd- âs volwasse programma aanbieje op ôs GVK!

Tot slot: vur idderein dae zich ni geroope vult um meij te doon, mâr wal zin haet in en fiësje: zet zaoterdig 23 september in diene agenda en maak ut meij in ’t Haere!

Weej winse ôg vuül suukses en tot gauw

Kemissie Liedjeskonkoer